الفصل الأول
داية وماشطة
( إيه تعمل الماشطة فى الوش العكر )
·
* مين
هى الداية ؟
· - هى اللى بتولد الستات ، وساعات يقولوا عليها مولده أو القابلة .
* فيه عمل تانى لها ؟
- أه ممكن تبقى ماشطه، وبيقولوا عليها بلانه أو نتافه أو محففه .
* ياعنى أيه عملها ؟
- يعنى توضب العرايس وتزوقهم وتحففهم " تشيل الشعر " .
* يعنى إيه تحففهم ؟
- يعنى تشيل الشعر من الجسم بالحلاوة ، وتنتف الحواجب ، ويقولوا عليها حفافة أو نتافه ومش شرط تكون دايه ، قليل اللى بتشتغل داية وماشطة .
* بتعمل الحلاوة أزاى ؟
- تجيب سكر ولمون ومياه وتدوبهم وتحطهم على النار لحد ماتمط زى الأستيك ، وممكن تتعمل بالعسل الأسود ، وتفضل تمعط فيها لحد ما تلين وتبقى زى الملبن فى أيديها .*
هامش*
مراكز التجميل :
أصبح يقوم بهذا العمل الآن مراكز تجميل
متخصصة ، والعروسة تذهب لديهم لمدة شهر أو عدة أسابيع قبل الزواج لعمل ( حمام مغربى
- حمامات كريم للبشرة – وأزالة الشعر )
وهناك كذلك بعض الحمامات فى المناطق الشعبية تمارس هذا الدور مثل : حمام التلات والأربعاء
ببولاق أبو العلا ، وتسمى " سويت " ويمكن عمل تاتو للعروسة على أجزاء
كثيرة من الجسم سواء ظاهرة فى الذراع والأيدى ، أو مختفية على البطن والسرة والظهر
،وتذهب بعض البنات مع العروس إلى الحمام ، وهذا الطقس أصبح الآن بديل الحنة ،
وأحيانا فى البيوت الراقية، يحضرون امرأة تسمى ( ستونه ) هى وفرقتها لعمل التاتو
للبنات والعروسة .
ونقش الحناء قديما كانت توضع على اليد وفى
الرجلين ، الآن أصبح التاتو يصنع فى مناطق عديدة من الجسم .
وأحيانا يكون ملحق بهذه المراكز ( كوافير)
لتصفيف الشعر ، ومتخصصون فى الزينة والمكياج ، ويمكن أن يلحق بها أيضا مراكز
للتجميل مثل : السنفرة بالليزر أو عمل بعض عمليات التجميل للعروسة مثل : التقشير
والتصغير والتكبير لمناطق معينة وأشهرها الثدى والأنف وأيضا مراكز لتجميل الرجال (
العريس ) وتأجير فساتين الزفاف والسوارية والأكسسوارات، وأحيانا يتبعها قاعات
للأفراح وغيرها مثل مركز ورد الشام حاليا بالمهندسين
------------------------------------------------------------------
* فيه اعمال تانيه تقوم بها المرأة ؟
- يوه كتير قوى .
·
خدى عندك، زمان كان فيه الملاية تملا المياه
من الحنفيه بالبستله ، وفيه الخدامه أو الشغاله ودى بتخدم فى البيوت ، وفيه
الغساله ودى بتغسل الهدوم ، قبل انتشار الغساله اللى بالكهربا، كان بيبقى فوق
السطوح حجره اسمها أوضة الغسيل.
·
وفيه الخبازه ودى كانت بتخبز العيش بالفلوس
خصوصا العيش المرحرح لأنه بيحتاج شطاره ، وفيه الخياطه ودى كانت بتفصل الهدوم ،
وكان زمان كل بيت فيه ماكنة خياطه وفى الفرح يجبوها البيت تخيط للعروسة الهدوم .
· وفيه العرافه اللى بتشوف البخت وتضرب الودع ، وفيه المِغسله اللى بتغسل الميته ، وفيه المعدده والندابه وغيره أعمال كتير .
·
* هل ممكن الداية تشتغل مغسلة ؟
·
- لأ
مش ممكن ، عشان الناس هاتتشائم منها ، وبعدين المغسلة دى ممكن تطوع ببلاش من غير فلوس ، صواب ياعنى ، وممكن يكون حد عزيزمات عندها ، فوهبت نفسها لتغسيل الميتين زكاة ياعنى وممكن تشترى الكفن كمان للفقراء ، والست تغسل الستات بس،ولازم تكون طاهرة ، واللى تساعدها يفضل تكون بنت بنوت وبتصلى .
* هل معظم الأعمال دى بتقوم بيها ستات ؟
·
-لأ
·
فيه رجاله بس قليل ، الستات أكتر ،لأنهم
بيخشوا البيوت ويكشفوا على الحريم .
· ولأنهم غلابه الواحده منهم تكون هجاله وبتربى عيالها أو عزبه ، لكن اللى بتضرب الودع أو تشوف البخت بتبقى من الغجر .
·
* ليه من الغجر ؟
·
دى مهنتهم .
· تمشى فى الشوارع تقول : اضرب الرمل واشوف البخت وأقول .
·
* وأيه كمان ؟
· ساعات بيبيعوا أمشاط وفلايات وعقود وغوايش بلاسيتك فى الموالد أو السوق .
·
* مين هم الغجر ؟
· ناس ملهاش بلد تيجى عندنا وتعيش فى الخيش وساعات فيهم مداحين ، يمشوا يغنوا أو يمدحو فى الرسول ، ويغنوا على الأبواب فى رمضان ، وفيه قرداتيه ، وغوازى ، واللى بيدقوا الزار أو الوشم على اليدين ، وفيهم رقاصين غوازى ياعنى .
·
* مين اللى بيطاهر البنات أو
الصبيان ؟
·
البنات .
·
الداية ، والصبيان ، المزين .
· بس الحكومه دلوقتى منعت طهارة البنات ، لكن فيه ناس بتطاهر فى السر فى القرى .
* ليه ؟
دى عاده ، طلعنا لقينا كده ، وعشان البنات بتفور بدرى ، فماتهجش .
* ياعنى أيه ؟
دلوقتى مافيش جواز زى زمان الواحده كانت
تتجوز عندها 12 و13 سنه .
* طيب يعنى أيه يدقوا ؟
يعنى يعملوا وشم على الأيدين من على ضهرها
ويرسموا ( نخله – عصفوره – عروسه – ولد وماسك سيف وراكب على حصان ) وساعات يرسموا
على دراعهم أو على صدغهم .
بيقولوا بتحوش المرض وساعات يكتبو اسمهم .
* هل الرسومات دى لها دلالة معينه عندهم ؟
- العصفورة يقولك بيدقوها للمجنون ( عشان كده يقولك ده داقق عصافير ) والعروسة السفيرة عزيزة ، للحب ، والأسد للشجاعة ، والولد بيقولوا أبو زيد الهلالى، أوحسن ونعيمة ، والسمكه مش عارفه .
* فيه حد تانى غير الغجر ؟
- فيه البدو ( العرب )
وفيه الغز والنَور والحلب والبرامكه .. وغيرهم كتير .
* مين البدو ؟
- دول عرب معاهم جمال وكانوا يجوا أيام
الحصاد عندنا فى البلد يشيلوا القمح أو الدره على الجمال، ويشيلو القش والتبن ،
ويخدو غله مقابل الشيل ، يقولوا جاين نصيف القمح .
الغز دول حراميه ، والنورى كمان ،وساعات
الحلبى ، ودول بيجوا من سوريا .
والبرامكه فيهم وفيهم منهم الغوازى والمغنوتيه ، ومنهم حراميه .
فيه أعمال غير كده ؟
كوديه الزار .
ودى بتدق الزار فى البيوت أو فى بيتها ،
ومعظمهم عايشين عند سيدى أبو السعود كل تلات تلاقى فيه دقة زار .
ودلوقتى بيتعمل حفلات زار والناس تتعزم عليه
زى الفرح .
ليست هناك تعليقات:
إرسال تعليق