بخت أمى خدته فى كمى

دخلت خالتى بمبه من الباب وى فى غاية الأستغراب والدهشة , وعندما جلست عند أقرب كرسى فى الصالة , أدارت قرص التليفون وطلبت صديقتها وداد وأخذت تحدثها :
اسكتى ماقلتلكيش الصبح رحت مع الست هدى جارتنا نزور بنتها ناهد اللى أجوزت من كام يوم , وعايشة مع أهل جوزها فى بيت واحد .
رحنا يا حبيبتى لقينا البت وشها قد اللقمة يا قلب أمها ووشها أصفر وزى اللمونه .
امها سألتها : مالك ياناهد , مالك ياقلب أمك ؟
البت سهمت وسكتت.
رحت أنا وحياتك خدت البت على جنب , واقعدت أقررها .
عرفت أنها حامل , وشقيانة فى الشغل طول النهار وبترجع مهدود حيلها , وحماتها قاعدة طول الليل والنهار أوامر اتى ودى أعملى .
البت تعبت .
وبعدين بكت وقالت شفتى يا خالتى بمبه : بخت أمى خدته فى كمى .
كنت فاكرة أنى هرتاح , طلع تعب برة وجوة .
وحياتك مسكت البت وخدتها فى حضنى وقلت لها : يا حبيبتى كلنا كده , أنت فاكرة أنه فى راحة .
مسحت البت دموعها وقامت عملت لنا شاى .
**************************************************************

سكر مكنه

خرجت خالتى بمبه فى الصباح لشراء بعض لوازم البيت .
كان الجو  مزدحما رغم ان الساعة العاشرة صباحا .
وعندما عادت !لى البيت طلبت جارتها عزيزة فى التليفون
وأخذت تحكى لها ما حدث :
اسكتى ياحبيبتى مادرتيش خرجت الصبح فضلت خيرك اشترى
لوازم البيت من سكر وشاى والذى منه من سوبر ماركت كبير
فتح جنب مننا اسم كده حب زمان , أكل زمان .
المهم ما طولش عليكى قولى لأ طولى , اشتريت سكر اعدت أدور يجى ساعة
على قمع سكر بتاع زمان اللى جبهولى فضلت خيرك عمك أبوسيد .
!ن ألاقى منه مالقيتش , قلت يابت هاتى سكر مكنه ( قوالب ) دورت مالقيتش.
قلت هاتى سكر ( سنترفيشى ) كدا محبب وزى البلور , مالقيتش .
قربت من البياع وسألته : ألا قولى يا خويا فين الخير بتاع زمان اللى كان يرد
الروح ويدوب فى الكوباية زى الفل .
ضحك البياع وقال : ما و قدامك ياحاجه , أدور فى سلقط فى ملقط مافيش .
قلت يا بت أسألية تانى : قولى ياخويا فين وحياتك السكر بتاعنا ؟
ضحك البياع وقال : ماو قدامك أهوه ياامه .
الراجل زهق منى ماكدبتش خبر , رحت للكبير بتاعهم , واقف فى نص المحل
زى خيال المقاته وسألته : ألا قولى يا أدلعدى يا خويا فين السكر المكنة بتاع
زمان ؟
ضحك وقال : قول للزمان ارجع يازمان .
قلت له هو انت بتتمألت عليا , ورحت قالعه فضلت خيرك الشبشب اللى فى
رجلى وات يا جرى وراه فى المحل .
هو يجرى وانا اجرى وراه , وبقى مولد وصاحبه غايب .
وكل ده ورجعت وحياتك أيد ورا وأيد قدام .
وقال على راى المثل : الناس خيبتا السبت والحد وانا اللى خبتى ماوردت
على حد .
وسلام بقى لحسن سامعه صوت أبو سيد بيكح .

خالتى بمبه من هى ؟

خالتى بمبه شخصية نسائية , ظهرت فى برنامج ربات البيوت الذى كان يقدم فى البرنامج العام , ومازال !لى الآن .
وكانت خالتى بمبمه سيدة رغاية تترك بيتها وتتحدث عن كل شئ فى الدنيا , وفى نهاية تختم كلامها بمثل شعبى عما كانت تتحدث عنه .
وتقول على رأى المثل :.....  وكان لها  زوج طيب مثل حال الرجال فى ذلك الوقت اسمه أبو سيد .
كانت تخاف منه أوتدعى ذلك وتبدأ كلامها أصل الراجل أبو سيد جوزى حصل منه كذا وكذا وكذا .
وتحكى وعندما تسمع صوته ينادى : يا خالتى بمبه , تنهى كلامها نعم يا أبوسيد .
سوف استدعى هذه الشخصية وأعيدا الآن فى الحاضر , ونعرف ماذا تقول عندما تواجه مشكلات هذا
الواقع وهذه الأيام وسوف نتختم حديثنا بمقولة على رأى المثل . ونختار مثلا يناسب ما حدث .